يعنى ايه بيتكوين؟
البيتكوين – Bitcoin: هى عملة إفتراضية يعنى وجودها على الانترنت وملهاش وجود مادى زى باقى العملات, ومُشفرة لإنك مش بتعرف مين بيحول فلوس لمين, ولامركزية يعنى مفيش سلطة بتتحكم فيها, وهى بديل آمن وسريع للتعاملات المالية لإنها بتوفر التعامل بين الاشخاص وبعضهم, وحتى المؤسسات بدون اى وسيط فى التعاملات المالية بعمولة منخفضة جدا.
من هو مؤسس البيتكوين وكيف بدأت؟
تم نشر بحث تحت إسم ساتوشى ناكاموتو Satoshi Nakamoto , فى شهر نوفمبر 2008 يُعلِن فيه عن عملة البيتكوين كبديل الكترونى للعملات الحالية, وهى واحدة من تطبيقات تكنولوجيا البلوكشين.
البحث الذى قدمه ساتوشى ناكاموتو كبداية لميلاد البيتكوين
لو حابب تقرأ البحث كامل, ممكن تحمله من هنا
قيمة البيتكوين
قيمة عملة البيتكوين غير مستقرة وتتغير حسب الطلب والعرض منها, بس خلينا نقول إن سعرها بيزيد بشكل جنونى خصوصا من بداية شهر فبراير 2017 سعرها كان حوالى 1000 دولار, وشهر ديسمبر سعرها وصل لحوالى 20 الف دولار!!
مميزات البيتكوين
خلينا نتفق إن العملات الرقمية بيكون ليها مميزات العملات العادية, وزيادة على كدة هنزود شوية مميزات إضافية وهى إنها::
-
لامركزية
مفيش مؤسسة او حتى دولة مسؤلة عن البيتكوين ( على عكس العملات العادية: الدولة المسئولة عن العملة بتقدر تطبع عملتها, زى ما أمريكا بتطبع دولارات مثلأ )
-
محدودة
العدد الاجمالى للبيتكوين هيكون 21 مليون بيتكوين فقط
-
لا يوجد وسيط
التعامل بيكون من شخص الى شخص Peer-To-Peer او من منظمة الى منظمة, يعنى مفيش وسيط بينكم زى البنك مثلأ, وبالتالى ده بيخلى التحويل بالبيتكوين يتم أسرع من التحويل العادى
-
الأمان والخصوصية
مفيش حد هيعرف إنت مين أو حتى بتحول فلوس لمين, مفيش جهة معينة هتسالك إنت جبت الفلوس دى منين, كل ده لإن ببساطة إسمك مجهول, كل اللى موجود هو عنوان محفظتك الالكترونية اللى بيكون فيها فلوسك, ده غير إن التحويل مش بيشترط وجود أى حساب بنكى وده هيساعدك توصل فلوسك لأى مكان فى العالم!
شرح بالتفصيل: كيفية إنشاء محفظة الكترونية للعملات الرقمية ( قريبا ) -
السرعة والعمولات
التحويلات البنكية بتاخد وقت طويل على ما توصل للطرف التانى, ده غير عمولات البنك. على العكس, التحويل عن طريق البيتكوين بيتحول فى وقت اقصر بكتير من التحويل البنكى, ده غير إن العمولات بتكون قليلة جدأ.
عيوب البيتكوين
زى ما اتكلمنا عن المميزات لازم نتكلم شوية عن بعض العيوب وهى:
-
استخدامها فى غسيل الاموال والتحويلات المشبوهة
لإنها عملة مُشفرَة وبتحافظ على هوية مستخدميها, ده بيخلى ناس كتير تستخدمها كوسيلة فى تحويلات مشبوهة زى غسيل الاموال وتجارة المخدرات وغيرها
-
هوية مؤسس البيتكوين – ساتوشى ناكاموتو
فى شكوك كتيرة فى الموضوع ده بسبب عدم تحديد هوية المؤسس, مفيش حد عارف إذا كان ده شخص ولا مجموعة ولا حتى دولة!
-
بطىء عمليات التحويل
كثرة التحويلات بمبالغ صغيرة جدا بتتسبب فى بطىء عمليات التحويل لإنها بتحتاج الموافقة عليها وده بيتسبب فى وجود بطىء فى التحويل
-
عدم إستقرار السعر نسبيا
سعر البيتكوين بيتغير بشكل ملحوظ, حاليا الى حد ما السعر شبه مستقر فى حدود 15 الف دولار, بس فى العموم تغيير قيمة العملة مش بيخلى ناس كتيرة تستخدمها ويعتبر عيب الى حد الآن, بالرغم من كدة فى ناس بتكسب فلوس بسبب تغيير سعرها عن طريق شراء بسعر قليل وبيعها بسعر عالى وهكذا
-
البيتكوين فقاعة اقتصادية
لحد دلوقتى بيعتبر كتير من الاقتصاديين ان البيتكوين هى مجرد فقاعة اقتصادية, هتخلص ويحصل بعدها ازمات اقتصادية, بس البيتكوين بتثبت عكس الكلام ده كل يوم وحاليا فى بنوك كتيرة بتستعمل العملات الرقمية زى عملة الريبل – Ripple!
طرق الحصول على البيتكوين
خلينا نتفق إن البيتكوين زى الذهب, ليها كمية محدودة وهتخلص, بعكس العملات العادية ممكن طباعتها وده بيسبب تضخم فى الاقتصاد, بس بما إننا بنقول إن البيتكوين زى الذهب, يبقى لازم نسأل الذهب بييجى منين؟
الذهب بييجى بطريقتين:
- التعدين
- الشراء
ودى الطرق اللى تقدر تجيب بيها بيتكوين:
- تعدين البيتكوين بنفسك
- التعدين السحابى Cloud Mining
- شراء البيتكوين من مواقع الصرافات الالكترونية
- الشراء المباشر
موقع Hashflare يعتبر واحد من افضل المواقع فى التعدين السحابى فى الوقت الحالى.
شرح بالتفصيل: شرح موقع Hashflare وكيفية الربح والاستثمار فيه
سواء جبت البيتكوين عن طريق التعدين او عن طريق الشراء, لازم تحتفظ بالكمية اللى اشتريتها, وده دور محفظة البيتكوين ودى بتشيل فيها البيتكوين والعملات الرقمية اللى معاك
شرح بالتفصيل: شرح طريقة عمل محفظة بيتكوين على موقع BitGo فى 4 خطوات بالصور
مين المسئول عن حماية البيتكوين؟
لازم تعرف إن البيتكوين مُعتمدة على تكنولوجيا البلوكشين, والبلوكشين بتكون متوزعة عند كل اللى بيستعملوها وبالتالى خلينى اقولك إن اللى بيحمى البيتكوين هما المُعدِنين Miners.
اللى بيحصل كالآتى:
إنت عاوز تعمل تحويل لشخص ما, بتحدد قيمة التحويل وبتبعت التحويل لشخص معين, لازم قبل ما يوصل للشخص ده يعدى على الماينرز, وهما دورهم يتحققوا من صحة العملية, وبعد كدة يوافقوا عليها, وآخر حاجة إنهم بيربطوا العملية دى فى السلسة الطويلة اللى هى البلوكشين, وبكدة تبقى العملية تمت والفلوس وصلت للشخص التانى.
المُعدِنين Miners بيستفادوا ايه؟
طيب الناس دى دورهم إنهم يحافظوا على البلوكشين ويتاكدوا من صحة المعاملات المالية, هما بيعملوا كدة ليه بأة؟
الماينرز بياخدوا
- مكافأة قصاد تأمينهم للبيتكوين
- عمولة التحويل اللى إنت بتدفعها علشان تقدر تبعت التحويل
شرح بالتفصيل: شرح التعدين فى البيتكوين بالتفصيل ( قريبأ )
—-
وبكدة اكون خلصت الموضوع وهختم الموضوع بمعلومة بسيطة:
لو كنت إستثمرت 100 دولار فى البيتكوين من سنة 2010 كان هيبقى معاك اكتر من 28 مليون دولار!
