البلوكشين | شرح كل ما يخص تكنولوجيا البلوكشين للمبتدئين
قبل البدء فى الشرح لازم تعرف إن البلوكشين مش هى البيتكوين!
مقدمة فى البلوكشين
خلينا نقول ان البلوكشين عبارة عن تكنولوجيا ثورية جديدة, زيها زى الانترنت اول ما ظهر – وممكن نعتبرها اكثر ثورية من الانترنت! – وابتدينا نعرف بوجود البلوكشين فى شهر نوفمبر 2008 ,بسبب نشر بحث تحت إسم مستعار يُعرف بـ ساتوشى ناكاموتو Satoshi Nakamoto يُعلِن فيه عن عملة الكترونية, وهى البيتكوين والبيتكوين هى تطبيق من تطبيقات تكونولوجيا البلوكشين.
نبذة بسيطة عن البيتكوين
البيتكوين هى عملة رقمية مُشفرة ولا يوجد سلطة تتحكم فيها, وهى تعتبر بديل آمن وسريع للتعاملات المالية حيث توفر التعامل بين الاشخاص وبعضهم, وحتى المؤسسات بدون اى وسيط فى التعاملات المالية, يعنى ببساطة مش هتحتاج لبنك!
عاوز تعرف اكتر؟ إقرأ شرح البيتكوين بالتفصيل
ايه علاقة البلوكشين بالبيتكوين؟
خلينا اسألك سؤال يوضحلك العلاقة بينهم, ايه علاقة الإيميل بالانترنت؟
ببساطة, الانترنت هو التكنولوجيا إنما الإميل هو مُجرد تطبيق على التكنولوجيا دى, وهكذا اليوتيوب والفيسبوك, كل دول وغيرهم عبارة عن تطبيقات على الانترنت مش هما الانترنت!
!بإختصار: البلوكشين هى التكنولوجيا والبيتكوين هى تطبيق على التكنولوجيا دى.
ودلوقتى علشان تقدر تفهم البلوكشين بتشتغل ازاى, لازم تعرف شوية معلومات بسيطة عن قواعد البيانات العادية وعيوبها
قواعد البيانات العادية وعيوبها
قواعد البيانات العادية بتكون موجودة على سيرفر واحد او حتى متوزعة على اكثر من سيرفر, وبيكون متحدد مين الاشخاص اللى ليهم الصلاحيات انهم يشوفوا البيانات اللى فيها, والصلاحيات بتختلف من لشخص لشخص حسب منصبه على سبيل المثال.
فمثلأ: لو إحنا فى مؤسسة كبيرة, كل مجموعة من الموظفين يقدروا بيشوفوا البيانات الخاصة بالقسم بتاعهم بس, إنما مدير المؤسسة مثلأ هيكون ليه الصلاحية إنه يشوف كل بيانات المؤسسة وهكذا.
اهم عيوب قواعد البيانات العادية:
- وجود سلطة متحكمة فيها. ( ممكن المدير او اى حد ليه الصلاحيات إنه يغير اى بيانات او حتى يمسحها خالص! )
- قابلية حدوث عطل فى السيرفر او حتى فى مجموعة السيرفرات اللى متخزنة عليهم قواعد البيانات
- غير آمنة بشكل كافى بسبب إنها مُعرضة للإختراق وسرقة البيانات اللى فيها
البلوكشين هى بديل لقواعد البيانات العادية, بديل مفهوش مسئول واحد متحكم فيه, بديل آمن ومُشفر, بديل يستحيل إختراقه!
شرح البلوكشين
البلوكشين هى كلمة من مقطعين:
بلوك – Block: ودى ممكن نمثلها حاليا للتبسيط إنها عبارة حلقة حديد وبتبقى جواها بيانات
شين – Chain: ودى إفترض معايا إنها السلسلة الحديد
ف نقدر نقول إن البلوكشين عبارة عن حاجة شبه السلسلة الحديد, كل بلوك جديد فيها بيمثل حلقة حديد جواها بيانات وبتتربط فى السلسلة, مع كل بلوك جديد السلسلة بتبقى اطول واكثر آمان وبيخليها يستحيل إختراقها!
تخيل إن البلوكشين عبارة عن حاجة شبه الصورة دى:
كل بلوك – او حلقة حديد – بيكون جواه بيانات معينة بتتحفظ فيها, ومش بينفع تعدل عليها او تحذفها, وبيكون فى نسخة من السلسلة دى على جهاز كل شخص او مؤسسة بتتعامل بنفس البلوكشين, وبيتم تحديث النسخة دى عند كل الناس المتوصلين بيها بمجرد حدوث أى تغيير فى السلسلة
فمثلأ لو هنعمل تحويل Transaction بأى عملة رقمية; إنت اول ما هتعمل التحويل, هيحصل حاجة زى اللى فى الصورة دى:
كل الاجهزة المتوصلة بالبلوكشين دى هيلاحظوا التغيير وهو إن فى واحد عمل تحويل.
مميزات البلوكشين / ليه نستخدم البلوكشين بدل من قواعد البيانات العادية؟
الاسباب كتيرة بس علشان الموضوع يبقى قصير هركز على اهم اتنين من مييزاتها.
اللامركزية
مفيش شخص او مؤسسة واحدة تقدر تتحكم فيها, بعكس كل المؤسسات المالية زى البنوك مثلأ!
الحماية والآمان
نقدر نخزن البيانات بطريقة آمنة يستحيل اختراقها, لسببين أساسيين:
– البلوكشين متخزن منها نُسخة عند كل شخص بيستخدمها والنسخة دى بتتحدث كل ما بيحصل اى تغيير
– مينفعش تعمل اى تعديل او مسح, تقدر تضيف بس ( مينفعش تكسر حلقة حديد من السلسلة, تقدر تضيف حلقات جديدة بس )
زى ما قلتلك فوق; البلوكشين عبارة عن سلسلة كلها حلقات حديد, ممكن تضيف فيها حلقات جديدة, إنما مينفعش تعمل تعديل او حذف فيها, ولو إفترضنا إن ده هيحصل يبقى هتحتاج تخترق البلوكشين كلها, لإنك علشان تكسر حلقة منهم هتحتاج تكسر الحلقة اللى قبلها وهكذا, وده شىء يستحيل حدوثه!
والصورة دى بتوضح فكرة المركزية ( يكون فى مركز للبيانات مسئول عن توزيعها للمستخدمين ), واللامركزية ( مفيش اى مركز للبيانات, كل مستخدم عنده نسخة من البيانات ), والرسمة دى خليها فى دماغك علشان دايما هتفكرك بأهم فرق بين قواعد البيانات العادية والبلوكشين:
تحديات ومشاكل البلوكشين
خلينا متفقين إننا بنتكلم عن ثورة تكنولوجيا جديدة وكالعادة لازم يقابلها تحديات زيها زى أى تكنولوجيا جديدة بتغير العالم, ومن اهم التحديات:
المؤسسات المالية
زى ما وضحنا إن العملات الرقمية واحدة من تطبيقات البلوكشين وده بيخلى المؤسسات المالية زى البنوك من اكبر تحديات التكنولوجيا لإنها ببساطة بتلغى دور البنوك الحالى وده هيخلى البنوك تحاربها او تلاقى طريقة تتماشى معاها.
لا يوجد مجال للخطأ فى التعامل
زى ما إعتبرنا إن من المميزات هو إنك تقدر تضيف بس منغير ما نقدر نعمل تعديل او حذف, هنعتبرها من التحديات فى نفس الوقت لإن دى ممكن تسبب مشكلة لمستخدين كتير.
الخصوصية والاعمال الغير المشروعة
للأسف زى ما البلوكشين بتوفر بديل آمن وسريع وكمان رخيص عن إستخدام البنوك, هى فى نفس الوقت بتخليك مجهول الهوية, والميزة دى بيستغلها ناس كتير فى الاعمال الغير مشروعة: تجارة السلاح, تجارة المخدرات, غسيل الاموال, .. وغيرها.
*كلامى هنا عن إستخدام تكنولوجيا البلوكشين فى القطاع المالى والعملات الرقمية على وجه الخصوص
القوانين والسياسات الحالية للدول
تكنولوجيا البلوكشين حاليا تُعارِض قوانين وسياسيات دول كثيرة لإنها بتوفر طريق آمان للخارجين عن القانون, لا توجد سلطة تحكُمها, .. وغيرها من الاسباب التى تجعلها مُعارضة لسياسيات كثير من الدول, وعلشان تتحل المشاكل دى لازم يحصل تعديلات فى القوانين والسياسيات علشان تتأقلم مع وجود تكنولوجيا بالقوة دى
صعوبة التغيير
فى ناس كتيرة ممكن تقرأ الكلام ده وتفتكر إنه خيال لمجرد إنهم مش مُتقبلين التغيير!
مشكلة مقاومة التغيير وصعوبته فى البداية دى حاجة طبيعية, بعد كدة بنتأقلم مع الواقع, وده اللى حصل بالظبط فى 2004 مع بداية ظهور الفيسبوك والناس كانت رافضة الفكرة لمجرد إنها حاجة جديدة عليهم, دلوقتى وبعد 13 سنة فى أكتر من 2 مليار مستخدم للفيسبوك فى الشهر!!
نقص الخبرات
ده تحدى معروف لأى تكنولوجيا جديدة, الناس مش بيبقوا فاهمين التكنولوجيا, حتى اغلب العاملين بمجال تكنولوجيا المعلومات والبرمجة نفسهم لسه مش عارفين تكنولوجيا البلوكشين عبارة عن ايه وبتشتغل ازاى, وبعضهم معرفته مُقتصرة على البيتكوين فقط
تحدى نقص الخبرات من اهم واصعب التحديات من وجهة نظرى لإنه أساس التطوير فى التكنولوجيا وتوسيع نطاقها وزيادة تطبيقاتها
——–
أخيرا, حابب اقول إن دى مش “موضة” او حاجة هتختفى, لأ دى تكنولوجيا لسه بتتطور وتطويرها مش هيقف بالعكس بيزيد يوم بعد يوم!
إحنا بنتكلم عن تكنولوجيا هتقضى على وجود مؤسسات كاملة وهتفتح الباب لمؤسسات جديدة تظهر, وظائف كتيرة هتختفى بسببها ووظائف تانية السوق هيبدأ يحتاجها, ده نفس اللى حصل فى بداية سنة 2000 كان الانترنت بالنسبة للناس حاجة جديدة ومش مفهومة كويس, لكن بالرغم إن الانترنت كان سبب فى إختفاء وظائف كتيرة, هو فتح الباب لوظائف كتيرة جدااا مكنتش موجودة قبل كدة ولحد دلوقتى فى وظائف جديدة السوق محتاجها, من 10 سنين مكنش حد ممكن يتخيل إن دى هتبقى وظائف فى المستقبل, وده بالظبط اللى هيحصل مع البلوكشين!!
البلوكشين مش بيتكوين ولا حتى عملات رقمية, البلوكشين عبارة عن تكنولوجيا ممكن يتعمل بيها تطبيقات هتعتبرها خيال ومش هتصدقها, تقدر تقول عليها بكل ثقة إنها تكنولوجيا هتغير العالم فى الكام سنة الجايين.
إستثمر وقتك وإعرف اكتر عن تكنولوجيا البلوكشين مهما كان مجالك, لإنها ببساطة هى المستقبل!
